Svínainflúensa er bráð sýking í öndunarvegum svína af völdum inflúensu A veiru. Þessar veirur er einnig að finna í villtum fuglum, fiðurfé, hestum og mönnum. Ný svínainflúensuveira sem nú hefur greinst í mörgum ríkjum Bandaríkjanna og í Mexíkó inniheldur erfðaefni frá svína-, fugla- og mannainflúensu. Veiran berst að því er virðist frá manni til manns og virðist valda skæðum sjúkdómi í Mexíkó en vægum sjúkdómi í Bandaríkjunum. Smit berst ekki með neyslu svínakjöts.

Í Evrópu hefur enn sem komið er greinst eitt tilfelli á Spáni með tengsl við Mexíkó en önnur tilfelli hafa ekki verið staðfest. Ekki er útilokað að veiran geti borist hingað til lands með ferðamönnum. Einkenni svínainflúensu eru skyndilegur hiti, vöðvaverkir og einkenni frá öndunarfærum. Einkenni svínainflúensunnar í Mexíkó virðast vera skæðari en annars staðar og eru að auki í sumum tilfellum með uppköstum og niðurgangi.

Alþjóðaheilbrigðisstofnunin (WHO) í samvinnu við sóttvarnastofnanir í Bandaríkjunum (CDC) og Evrópu (ECDC) ásamt framkvæmdastjórn ESB hafa með sér náið samstarf við að fylgjast með og meta stöðuna. Íslendingar fá upplýsingar frá WHO og hafa jafnframt nána samvinnu við ECDC og ESB um vöktun og viðbrögð.

Svínainflúensan sem nú geisar í Bandaríkjunum og Mexíkó er næm fyrir veirulyfjunum Tamiflu (oseltamivir) og Relenza (zanamivir) en ónæm fyrir amantidín-lyfjum. Á Íslandi eru til lyfjabirgðir af Tamiflu og Relenza fyrir þriðjung þjóðarinnar. Tekið skal fram að þau inflúensulyf sem aflað hefur verið til landsins eru virk gegn svínainflúensunni en bóluefni sem veitt getur vörn er enn ekki tiltækt en verið er að reyna að hefja framleiðslu þess.

Frekari upplýsingar er að finna á http://www.influensa.is/ og www.landlaeknir.is/Smitogsottvarnir.

(Texti fenginn af vef Landlæknisembættisins, 28. apríl 2009).