Avamys

Avamys nefúði er sykurvirkur barksteri sem hefur öfluga bólgueyðandi verkun. Lyfið dregur úr bólgum af völdum ofnæmis og er því notað við einkennum ofnæmiskvefs, svo sem nefstíflu, nefrennsli, ertingu í nefi, hnerra, votum augum og ertingu eða roða í augum. Ofnæmiseinkenni geta komið fram á ákveðnum árstímum og orsakast af frjókornum frá grasi eða trjám en einnig geta dýr, rykmaurar og myglusveppir valdið ofnæmiseinkennum.

---

Notkun á lyfi

Lyfjaform:
Nefúði.

Venjulegar skammtastærðir:
Fullorðnir og börn, eldri en 12 ára: 1-2 úðaskammtar (27,5-55 míkrógrömm) í sitthvora nös einu sinni á dag. Börn á aldrinum 6-11 ára: 1 úðaskammtur (27,5 míkrógrömm) í sitthvora nös einu sinni á dag. Hristist fyrir notkun.

Hversu langur tími líður uns verkun kemur fram:
Innan 8-24 klst., en hjá sumum næst ekki full verkun fyrr en nokkrum dögum eftir að notkun lyfsins er hafin.

Verkunartími:
Verkun lyfsins kemur fram 8 klst. eftir fyrstu notkun og helst í 24 klst. Engu að síður getur notkunin þurft að hafa átt sér stað í nokkra daga áður en hámarksverkun er náð.

Þörf á að breyta mataræði meðan lyfið er tekið:
Engin.

Geymsla:
Geymist við stofuhita með hlífðarhettu á þar sem börn hvorki ná til né sjá. Lyfið má ekki geyma í kæli eða frjósa. Geymsluþol lyfsins er 2 mánuðir eftir að notkun hefst.

Ef skammtur gleymist:
Notaðu lyfið um leið og þú manst eftir því. Ef stutt er til næsta skammts skaltu sleppa þeim sem gleymdist og halda áfram að nota lyfið eins og venjulega. Ekki á að tvöfalda eða bæta upp skammt sem hefur gleymst að nota.

Hvernig á að hætta töku lyfsins:
Ekki hætta notkun lyfsins nema í samráði við lækni.

Ef tekinn er of stór skammtur:
Þá skal hafa samband við lækni eða lyfjafræðing. Stórir skammtar geta valdið blóðnösum. Þó eiga skammtar lítið stærri en ráðlagt er ekki að skapa vanda.

Langtímanotkun:
Ef lyfinu er ávísað á barn skal fylgjast með hæð barnsins því greint hefur verið frá vaxtarskerðinu barna sem fá langvarnandi meðferð með Avamys.

---

Aukaverkanir

Aukaverkun	Tíðni			Leitið til læknis vegna einkenna		Leitaðu strax til læknis	Hættu strax töku lyfs
	Algeng >1%	Sjaldgæf <1%	Ekki þekkt	Sem eru alvarleg	Í öllum tilvikum
Blóðnasir
Sáramyndun í nefi

---

Milliverkanir

Aðrir sterar, m.a. til inntöku og inndælingar, útvortis á húð og í astmalyfjum, geta haft áhrif á verkun lyfsins.

Sjá öll lyf sem geta haft áhrif á

Má ekki nota með

Getur haft áhrif á

• Vfend
• Voriconazole Accord

---

Varúð

Læknir sem ávísar lyfinu þarf að vita hvort

• grunur leiki á um þungun eða að þú sért með barn á brjósti
• þú sért með ofnæmi fyrir virka efninu eða einhverju hjálparefnanna
• þú takir einhver önnur lyf
• þú sért með lifrarsjúkdóm
• þú sért með skerta starfsemi nýrnahettna

Meðganga:
Takmörkuð reynsla er af notkun lyfsins hjá þunguðum konum. Lyfið á ekki að nota á meðgöngu nema samkvæmt ráðleggingum læknis eða lyfjafræðings.

Brjóstagjöf:
Ekki er vitað hvort lyfið berst í brjóstamjólk.

Börn:
Lyfið er ekki ætlað börnum yngri en 6 ára.

Eldra fólk:
Venjulegar skammtastærðir.

Akstur:
Lyfið hefur ekki áhrif á aksturshæfni.

Áfengi:
Áfengi hefur ekki áhrif á verkun lyfsins.

Íþróttir:
Leyft við æfingar og í keppni.

---

Nánari upplýsingar

Nánari upplýsingar um lyfið er að finna í SPC texta og í fylgiseðli lyfsins, sem má finna á heimasíðu Sérlyfjaskrá. Ef upplýsingar hér stangast á við þær upplýsingar ber að fara eftir SPC texta lyfsins og/eða fylgiseðli.