Heilsufarsmælingar

Boðið er uppá heilsufarsmælingar í Lyfju Lágmúla kl. 8-16:30 virka daga og Smáratorgi kl. 8-13 alla virka daga. 

Æskilegt er að panta tíma í Smáratorgi. Eigi viðkomandi ekki pantaðan tíma má búast við einhverri bið vegna rannsóknarverkefnis sem þar fer fram og takmarkar aðgengið að hjúkrunarþjónustu.
Til að mögulegt sé að mæla blóðsykur og/eða blóðfitu er nauðsynlegt að mæta á fastandi maga.

Mælingar í boði

Blóðþrýstingsmæling

Viðskiptavinir ættu að athuga að það er mikilvægt að gefa sér góðan tíma til þess að mælingin verði sem árangursríkust. Það er til að mynda gott að hvílast og sitja í nokkrar mínútur áður en mælingin er framkvæmd. Ýmislegt getur nefnilega haft áhrif á mælinguna, t.d. streita og andleg spenna.

Hvað er blóðþrýstingur? 

Blóðþrýstingur er eins og nafnið gefur til kynna þrýstingur blóðsins í slagæðum líkamans og nauðsynlegur til að flytja næringu og súrefni til líkamsvefja. Hjartað dælir blóðinu um æðakerfið og blóðþrýstingur ræðst því einkum af afköstum hjartans og viðnámi æðakerfisins. Í einfölduðu máli er blóðrásin ekkert annað en dæla (hjartað) og pípur (æðarnar).  

Hvers vegna ætti ég að láta mæla blóðþrýstinginn í mér? 

Hjartavernd mælir með því að fólk ætti eftir 40 ára aldur að fara reglulega í hjartaeftirlit og fyrr ef ástæða þykir til. Þótt komi í ljós að niðurstöður séu allar innan eðlilegra marka er engu að síður mikilvægt að halda eftirlitinu áfram. Hve oft fólk fer í eftirlit er misjafnt, en eftirfarandi þumalputtareglur eru góðar til viðmiðunar: Heilbrigðir einstaklingar eldir en 40 ára ættu að fara reglulega í þessar mælingar. 

En ef ég er þegar í meðferð við of háum blóðþrýstingi? 

Það er mikilvægt fyrir fólk með háþrýsting að láta mæla sig reglulega enda krefst meðferð við háþrýstingi góðs eftirlits. Þá er ágætt fyrir lækni að hafa fleiri mælingar til viðmiðunar en þær sem hann sér um sjálfur á stofu. Sérhver í fyrrnefndum aldurshóp ætti að láta mæla sig reglulega og muna eftir að skrá hjá sér niðurstöður mælinganna. 

Verð: 490 krónur
Verð: 290 krónur, fyrir eldri borgara og öryrkja

Blóðsykursmæling

Vissir þú að mælingar á blóðfitu, blóðþrýstingi og blóðsykri eru meginþættir í ráðgjöf þegar ráða á heilt um hjarta- og æðasjúkdóma?

Reglulegt eftirlit er afar mikilvægt hvað varðar ofantalda þætti. Stundum er fólk í mörg ár með hækkaðan blóðsykur án þess að finna til nokkurra einkenna. Á þeim tíma geta engu að síður orðið umtalsverðar skemmdir í líkamanum áður en það uppgötvast. Með reglulegu eftirliti aukast líkurnar á því að viðkomandi geti sjálfur gripið inn í á frumstigi sjúkdómsins með breyttu líferni sínu. Á efri stigum sjúkdómsins er líklegra að grípa verði til róttækari aðgerða. Að láta mæla sig reglulega þarf ekki að vera flókið í framkvæmd. Fólk sem stundar slíkt er meðvitað og ber ábyrgð á eigin heilsu. 

Verð: 990 krónur 
Verð: 745 krónur, fyrir eldri borgara og öryrkja  

 Athugið að það þarf að vera fastandi fyrir blóðsykursmælingu.

Blóðfitumæling

Vissir þú að mælingar á blóðfitu, blóðþrýstingi og blóðsykri eru meginþættir í ráðgjöf þegar ráða á heilt um hjarta- og æðasjúkdóma?

Reglulegt eftirlit er afar mikilvægt hvað varðar ofantalda þætti. Stundum er fólk með of hátt kólesteról í blóði í mörg ár án þess að finna til nokkurra einkenna. Á þeim tíma geta engu að síður orðið umtalsverðar skemmdir í líkamanum áður en það uppgötvast. Með reglulegu eftirliti aukast líkurnar á því að viðkomandi geti sjálfur gripið inn í á frumstigi sjúkdómsins með breyttu líferni sínu. Á efri stigum sjúkdómsins er líklegra að grípa verði til róttækari aðgerða. Að láta mæla sig reglulega þarf ekki að vera flókið í framkvæmd. Fólk sem stundar slíkt er meðvitað og ber ábyrgð á eigin heilsu.

Í niðurstöðum kemur fram hvað heildarkólesterólið er og einnig góða fitan HDL, slæma fitan LDL, þríglyserið TRG, hlutfallið af mismunandi blóðfitum og blóðsykur.

Verð: 3.690 krónur 
Verð: 2.770 krónur, fyrir eldri borgara og öryrkja  

Athugið að það þarf að vera fastandi fyrir þessa mælingu.

Beinþéttnimæling

Beinþéttnimæling er einföld og sársaukalaus rannsókn sem sýnir ástand beina á augabragði.

Boðið er upp á beinþéttnimælingar í röngtentæki hjá Lyfju.  Þær eru framkvæmdar í Lyfju Lágmúla.

Verð: 1.990 krónur
Verð: 1.490 krónur, fyrir eldri borgara og öryrkja

Blóðrauðamæling

Blóðrauði kallast efnið sem gerir blóðið rautt og er það nauðsynlegt fyrir flutning súrefnis frá lungum til fruma líkamans.

Til að meta ástand rauðra blóðkorna er m.a. mælt hemoglobin og meðalrúmmál rauðra blóðkorna. Blóðleysi, skortur á járni, vítamín B12 og/eða fólati getur valdið lækkun á hemóglóbini og breytt rúmmáli blóðkornanna. B12 og fólat fæst m.a. úr grófu brauði, kjöti og vítamínum. Járnskort má bæta með því að borða járnauðugan mat, t.d. lifur, lifrarpylsu, blóðmör, lifrarkæfu og dökkt grænt grænmeti. Einnig er hægt að taka járntöflur en þá er mikilvægt að taka inn c-vítamín töflur eða drekka C-vítamínríka drykki/safa til að auka frásog járnsins og vernda magann.

Eðlilegt blóðrauðagildi:  
Hjá konum eru eðlileg mörk 118-152 g/L  
Hjá körlum eru eðlileg mörk 134-171 g/L  

Einkenni sem koma fram við járnskort/blóðleysi er einkum slappleiki, þreyta, svimi og jafnvel mæði, fölvi, höfuðverkur og ör hjartsláttur.  

Hverjum er mest hætt við járnskorti: 

  •  Konum á barneignaraldri, einkum konum sem fá miklar blæðingar  
  •  Barnshafandi konum  
  •  Blóðgjöfum  
  •  Öldruðum sem neyta einhæfðrar fæðu  
  •  Einstaklingum með blæðingar frá meltingarvegi, t.d. úr blæðandi magasári
  •  Áfengissjúklingum  
  •  Einstaklingum sem neyta ekki kjötmetis  
  •  Langtímanotkun ýmissa lyfja getur valdið járnskorti  
  •  Lyf með acetylsalisilsýru (td.aspirin)  
  •  Ákveðin gigtarlyf af NSAID flokki  
  •  Sýklalyfið Tetracyklin  
  •  Etidronat við beinþynningu  
  •  Pencilamin við nýrnasteinum

Verð: 990 krónur
Verð: 745 krónur, fyrir eldri borgara og öryrkja

Ekki er þörf á undirbúningi fyrir þessa rannsókn.

Súrefnismettun í blóði

Í blóðinu eru rauð blóðkorn og í þeim er blóðrauðinn (hemóglóbín).

Blóðrauðinn er stór sameind sem inniheldur járn, getur bundið súrefni og flutt það um líkamann.

Það er þannig hlutverk blóðrauðans og rauðu blóðkornanna að binda súrefni í lungunum og flytja það til allra vefja líkamans sem verða að fá súrefni til að geta lifað og starfað eðlilega.

Við eðlilegar aðstæður hjá ungu fólki er blóðrauðinn því sem næst 100% mettaður af súrefni í blóðinu sem kemur frá lungunum og er að finna í slagæðum líkamans. Súrefnismagn blóðsins ákvarðast bæði af lungnastarfsemi og ástandi hjarta og æðakerfisins. Eitt af því sem gerist hjá öldruðum er að súrefnismagn blóðsins (súrefnismettun blóðrauðans) minnkar vegna minnkaðrar starfsemi lungna og hjarta og teljast þessar breytingar til eðlilegra breytinga sem fylgja öldrun.

Ýmislegt óeðlilegt getur einnig orðið til þess að súrefnismagn blóðsins minnkar og ef súrefnismettunin fer undir 85% getur sést blámi t.d. á vörum. Svona breytingar geta orðið við hjartabilun og ýmiss konar lungnasjúkdóma.

Sumir anda illa vegna offitu, lömunar eða ofskömmtunar vissra lyfja og getur það leitt til lágrar súrefnismettunar í blóði. Sama er að segja um nokkra tiltölulega algenga lungnasjúkdóma eins og langvinna lungnateppusjúkdóma, astma og lungnabjúg. 

Eitt af því sem margir geta gert til að bæta súrefnismagn í blóði er að bæta líkamlegt ástand sitt með því að grennast og stunda heppilega hreyfingu eða líkamsþjálfun.

Ef um er að ræða sjúkdóma í lungum eða hjarta þarf að meðhöndla þá eins og kostur er og forðast lyf eða annað sem slævir öndun. Þeir sem eru með lungnabilun, oftast vegna langvarandi reykinga, geta þurft á stöðugri súrefnisgjöf að halda og þurfa alltaf að hafa súrefniskút hjá sér.

Verð: 990 krónur 
Verð: 745 krónur, fyrir eldri borgara og öryrkja

Verð fyrir mælingar sem teknar eru saman

  1. Blóðfita/kólesteról, blóðsykur, blóðþrýstingur, blóðrauði og beinþéttni
    Verð: 5.490
    Verð: 4.120 krónur, fyrir eldri borgara og öryrkja   
  2. Blóðfita/kólesteról, blóðsykur, blóðþrýstingur og beinþéttni
    Verð: 4.990
    Verð: 3.740 krónur, fyrir eldri borgara og öryrkja 
  3. Blóðfita/kólesteról, blóðsykur, blóðþrýstingur og blóðrauði 
    Verð: 4.490
    Verð: 3.370 krónur, fyrir eldri borgara og öryrkja 
  4. Blóðfita/kólesteról, blóðsykur og blóðþrýstingur 
    Verð: 3.990
    Verð: 2.990 krónur, fyrir eldri borgara og öryrkja