Virka efnið rabeprazól dregur úr myndun magasýru. Það er notað við sársjúkdómi í maga og skeifugörn, bólgu í vélinda vegna bakflæðis magasýru og Zollinger-Ellison heilkenni.

Það er einnig notað ásamt sýklalyfjum við sýkingu af völdum bakteríunnar Helicobacter pylori. Ef ekki tekst að uppræta Helicobacter-sýkingu veldur hún endurteknum magasárum, en til þess að vinna á bakteríunni þarf bæði sýklalyf og lyf sem minnka magasýruframleiðslu. Rabeprazól hindrar það að magasýra losnar úr sýrumyndandi frumum og dregur þannig úr framleiðslu magasýru. Lyfið þolist almennt vel og aukaverkanir þess eru vægar og skammvinnar.

Notkun:
10-20 mg á dag að morgni. Stærri skammtar við Zollinger-Ellison heilkenni. Töflurnar gleypist heilar með vatnsglasi. Má hvorki tyggja þær né mylja.

Lesið leiðbeiningar í fylgiseðli vel.