M-M-RVAXPRO

Lyfjabokin 05 (1)
Leitaðu í Lyfjabókinni Hér finnur þú öll skráð lyf á Íslandi sem seld eru í apótekum
Lyfjabókin

M-M-RVAXPRO

Opna mína lyfseðla
Bóluefni

Lyfseðilsskylt

Verðflokkur 0: Lyfið er ekki niðurgreitt og fellur ekki inn í greiðsluþrepakerfiðVirkt innihaldsefni: Hettusóttarveirur, Mislingaveirur, Rauðu hunda veirurSkráð 1. febrúar 2013

Mislingar, hettusótt og rauðir hundar eru sjúkdómar sem orsakaðir eru af veirum. Mislingar eru mjög smitandi og berst sjúkdómurinn manna á milli með úðasmiti. Sjúkdómnum geta fylgt alvarlegir fylgikvillar eins og heilabólga eða lungnabólga og á meðgöngu er hætta á fóstursýkingu eða fósturláti. Hettusótt er oftast nær vægur sjúkdómur en í einstaka tilfellum getur hún valdið heyrnaskerðingu og bólgu í eistum sem getur leitt til ófrjósemis. Rauðir hundar er vægur sjúkdómur í börnum. Þeim sem stafar mesta hætta af sjúkdómnum eru óléttar konur þar sem sjúkdómurinn getur valdið fósturskaða, eins og t.d. heyrnaskerðingu, blindu, vansköpun og jafnvel fósturláti. M-M-RVAXPRO inniheldur mislinga, rauðu hunda og hettusóttar veiklaðar veirur sem eiga að vekja upp mótefnasvörun í líkamanum án þess að fólk veikist af þessum sjúkdómum og veitir þannig vörn gegn þeim.

Notkun á lyfjum

LyfjaformStungulyf undir húð eða í vöðva.
Venjulegar skammtastærðirEinn skammtur samkvæmt bólusetningaráætlun.
Hversu langur tími uns verkun kemur framEkki liggja fyrir neinar upplýsingar um það hversu fljótt bóluefni byrjar að virka.
VerkunartímiBólusetningin endist til lífstíðar.
Þörf á að breyta mataræði meðan lyfið er tekiðEngin.
GeymslaGeymist í lokuðum umbúðum á köldum stað (2-8°C) þar sem börn hvorki ná til né sjá. Lyfið má ekki frjósa. Nota þarf hettuglasið innan 8 klst. frá því að lyfið hefur verið leyst upp.
Ef skammtur gleymistEf skammtur gleymist ber að gefa hann um leið og munað er eftir því þar sem möguleiki er að ekki hafi myndast nægilegt magn af mótefnum. Ekki má gefa tvo skammta í einu.
Hvernig á að hætta töku lyfsinsEkki er talið æskilegt að hætta gjöf lyfsins fyrr en allir skammtar hafa verið gefnir þar sem líkur eru á að ekki hafi myndast nægilegt magn af mótefni.
Ef tekinn er of stór skammturÁ ekki við.
LangtímanotkunLyfið er ekki ætlað til langtímanotkunar.

Aukaverkanir

Aukaverkanir eru yfirleitt vægar og ganga yfir á nokkrum dögum.

Algengar aukaverkanir (>1%):
  • Hiti
    Leitið til læknis
  • Roði, bólga og eymsli á stungustað
    Leitið til læknis
  • Taugaóstyrkur
    Leitið til læknis
Sjaldgæfar aukaverkanir (<1%):
  • Krampar
    Leitið strax til læknis
  • Ósamhæfðar vöðvahreyfingar
    Leitið strax til læknis
  • Sjóntruflanir, heyrnaleysi
    Leitið strax til læknis
  • Útbrot, kláði, bjúgur og öndunarerfiðleikar
    Leitið strax til læknis

Milliverkanir

Lyfið má ekki blanda í sömu sprautu við önnur bóluefni. Ef nota á önnur bóluefni þarf að nota aðra stungustaði. Ef ekki er bólusett samtímis þá þurfa að líða a.m.k. 4 vikur þar til bólusett er með öðru bóluefni sem inniheldur lifandi, veiklaða veiru. Ef þú hefur fengið gammaglóbúlín eða blóðgjöf úr öðrum manni þá þarf að fresta bólusetningu um þrjá mánuði.

Nánari upplýsingar

Leitið ráða hjá heilbrigðisstarfsmanni áður en lyfið er notað ef:

  • grunur leiki á um þungun eða að þú sért með barn á brjósti
  • þú sért með ofnæmi fyrir virka efninu eða einhverju hjálparefnanna
  • þú takir einhver önnur lyf
  • þú sért með hita eða sýkingu
  • þú sért með berkla
  • þú sért með skert ónæmiskerfi
  • þú hafir einhvern tíma fengið krampa
  • þú sért með ofnæmi fyrir eggjum
  • þú hafir nýlega fengið bólusetningu
MeðgangaLyfið er ekki ætlað konum á meðgöngu. Kona má ekki verða þunguð fyrr en þremur mánuðum eftir gjöf á bóluefninu.
BrjóstagjöfEkki má gefa lyfið nema brýna nauðsyn beri til.
BörnSamkvæmt bólusetningaráætlun hverju sinni.
Eldra fólkEkki er talin þörf á að bólusetja einstaklinga eldri en 40 ára.
AksturLyfið hefur ekki áhrif á aksturshæfni.
ÁfengiÍ litlum skömmtum hefur áfengi ekki áhrif á verkun lyfsins.
ÍþróttirLeyft við æfingar og í keppni.
AnnaðAdrenalín stungulyf verður að vera til staðar ef til bráðaofnæmis eða annarra ofnæmisviðbragða kemur. Bóluefnið má ekki gefa í æð.
Nánari upplýsingar um lyfið er að finna í SPC texta og í fylgiseðli lyfsins, sem finna má á heimsíðu Sérlyfjaskrá. Ef upplýsingar hér stangast á við þær upplýsingar ber að fara eftir SPC texta lyfsins og/eða fylgiseðli.