Duac

Lyfjabokin 05 (1)
Leitaðu í Lyfjabókinni Hér finnur þú öll skráð lyf á Íslandi sem seld eru í apótekum
Lyfjabókin

Duac

Opna mína lyfseðla
Lyf við bólum

Lyfseðilsskylt

Verðflokkur 0: Lyfið er ekki niðurgreitt og fellur ekki inn í greiðsluþrepakerfiðVirkt innihaldsefni: Benzóýl peroxíð, Klindamýcín_Skráð 1. janúar 2007

Duac hlaup er notað við meðhöndlun á vægum til miðlungs svæsnum gelgjubólum. Hlaupið hefur bæði væga hyrnisleysandi verkun og bakteríudrepandi áhrif og verkar sérstaklega gegn gelgjubólum sem í er bólga eða þar sem sáramyndun á sér stað. Duac inniheldur tvö virk efni; klindamýcín og benzóýl peroxíð. Klindamýcín er breiðvirkt sýklalyf sem hindrar próteinframleiðslu í bakteríum og hemur þar með vöxt þeirra. Lyfið er notað við sýkingum af völdum baktería sem eru næmar fyrir því og er oft notað staðbundið við gelgjubólum. Það fækkar einnig fríum fitusýrum á yfirborði húðarinnar þar sem það er borið á. Benzóýl peroxíð er eingöngu notað útvortis og hefur góð áhrif, bæði eitt sér og sem einn þáttur í meðferð með fleiri lyfjum. Auk sýkladrepandi áhrifa hefur það hyrnisleysandi verkun, dregur úr fituframleiðslu og þurrkar húðina.

Notkun á lyfjum

LyfjaformÚtvortis hlaup.
Venjulegar skammtastærðirNotist útvortis á sýkt svæði einu sinni á dag að kvöldi. Fyrst þarf að þvo bólusvæðið vandlega, skola með volgu vatni og þerra varlega.
Hversu langur tími uns verkun kemur framEkki að fullu þekkt og er jafnframt misjafnt eftir því hversu næmir sýklarnir eru fyrir virku efnunum. Í sumum tilfellum þarf 4-6 vikna meðhöndlun áður en bati kemur fram.
VerkunartímiBakteríudrepandi áhrif benzóýl peroxíðs vara í minnst 2 sólarhringa en verkunartími klindamýcíns er misjafn eftir því hversu næmir sýklarnir eru fyrir lyfinu.
Þörf á að breyta mataræði meðan lyfið er tekiðEngin.
GeymslaGeymist í lokuðum umbúðum þar sem börn hvorki ná til né sjá. Órofinn pakki geymist í kæli (2°C-8°C) en eftir opnun skal geyma lyfið við stofuhita og nota innan 2ja mánaða.
Ef skammtur gleymistNotaðu lyfið um leið og þú manst eftir því. Ef stutt er til næsta skammts skaltu sleppa þeim sem gleymdist og halda áfram að nota lyfið eins og venjulega. Ekki nota tvo skammta í einu.
Hvernig á að hætta töku lyfsinsHætta má notkun lyfsins þegar einkenni eru ekki lengur til staðar eða þegar ekki er þörf á lyfinu. Samfelld meðferð ætti ekki að vera lengri en 12 vikur nema í samráði við lækni.
Ef tekinn er of stór skammturLítil hætta er á öðrum einkennum en staðbundinni ertingu undan lyfinu. Hafðu samband við lækni ef einhver óvenjuleg einkenni koma fram.
LangtímanotkunSamfelld meðferð ætti ekki að vara lengur en í 12 vikur.

Aukaverkanir

Aukaverkanir lyfsins eru bundnar við notkunarstað. Það getur valdið ertingu, roða eða sviða en þau einkenni eru yfirleitt skammvinn. Lyfið veldur mikilli ertingu ef það kemst í snertingu við slímhúð og sé það borið á húðina þar sem hún er þunn, t.d. vegna exems. Þeir sem eru með viðkvæma húð þola lyfið illa og þurfa því að nota lyfið með mikilli varúð.

Algengar aukaverkanir (>1%):
  • Brunatilfinning
    Leitið til læknis
  • Kláði
    Leitið til læknis
  • Roði, flögnun húðar, húðþurrkur
    Leitið til læknis
Sjaldgæfar aukaverkanir (<1%):
  • Langvarandi og mikill niðurgangur
    Leitið til læknis
  • Versnandi gelgjubólur, bólgur í húð
    Leitið til læknis

Milliverkanir

Varúðar skal gætt ef samtímis eru notuð önnur sýklalyf á húð, lyfjasápur, húðhreinsiefni, sápur og snyrtivörur sem hafa sterka þurrkandi verkun og efni með háu alkóhólinnihaldi. Slíkt getur aukið hættuna á ertingu.

Nánari upplýsingar

Leitið ráða hjá heilbrigðisstarfsmanni áður en lyfið er notað ef:

  • grunur leiki á um þungun eða að þú sért með barn á brjósti
  • þú sért með bólgusjúkdóm í þörmum
  • þú sért með langvarandi lifrar- eða nýrnasjúkdóm
  • þú sért með ofnæmi fyrir einhverjum lyfjum
  • þú takir blóðþrýstingslækkandi lyf
MeðgangaTakmörkuð reynsla er af notkun lyfsins hjá þunguðum konum.
BrjóstagjöfEkki er vitað hvort lyfið berst í brjóstamjólk. Lyfið ætti ekki að nota samhliða brjóstagjöf.
BörnLyfið er ekki ætlað börnum yngri en 12 ára.
Eldra fólkLyfið er venjulega ekki notað.
AksturLyfið hefur ekki áhrif á aksturshæfni.
ÁfengiÁfengi hefur ekki áhrif á verkun lyfsins.
ÍþróttirLeyft við æfingar og í keppni.
AnnaðKonur á barneignaraldri ættu að nota fullnægjandi getnaðarvarnir. Varist að lyfið berist í augu, munn, slímhimnur og húð með opin sár eða exem. Mælt er með því að sólböð og notkun sólarlampa sé í lágmarki.
Nánari upplýsingar um lyfið er að finna í SPC texta og í fylgiseðli lyfsins, sem finna má á heimsíðu Sérlyfjaskrá. Ef upplýsingar hér stangast á við þær upplýsingar ber að fara eftir SPC texta lyfsins og/eða fylgiseðli.