Arixtra

Lyfjabokin 05 (1)
Leitaðu í Lyfjabókinni Hér finnur þú öll skráð lyf á Íslandi sem seld eru í apótekum
Lyfjabókin

Arixtra

Opna mína lyfseðla
Segavarnarlyf

Lyfseðilsskylt

Verðflokkur G: Lyfið er niðurgreitt og fellur inn í greiðsluþrepakerfiðVirkt innihaldsefni: FondaparinúxSkráð 1. ágúst 2006

Arixtra er notað til að koma í veg fyrir bláæðasegarek hjá sjúklingum sem fara í stórar bæklunarskurðaðgerðir á fótum, t.d. stórar hné- eða mjaðmarskiptaaðgerðir eða vegna mjaðmarbrots. Lyfið inniheldur virka efnið fondaparinúx en það hamlar ákveðna storkuþætti í blóðinu og truflar þannig blóðstorknunarferlið. Blóðstorknun er flókið ferli sem fer af stað þegar blóð kemst í snertingu við annað yfirborð en æðaveggi. Ef hætta er á óeðlilegri blóðstorknun og myndun blóðtappa, t.d. eftir aðgerðir, þarf að nota blóðþynnandi lyf. Ef blóðtappi myndast og stíflar slagæð, kemur fram blóðþurrð og jafnvel drep í þeim vefjum sem æðin liggur til. Ef blóðtappi stíflar bláæð, myndast bjúgur og bólga í þeim vefjum sem æðin liggur frá. Blóðstorknun verður fyrir tilstilli svokallaðra storkuþátta. Storkuþættir í blóði eru margir og rétt samspil þeirra á milli er nauðsynlegt til þess að blóð storkni eðlilega.

Notkun á lyfjum

LyfjaformStungulyf undir húð.
Venjulegar skammtastærðir2,5 mg einu sinni á dag.
Hversu langur tími uns verkun kemur framHámarksstyrkur í blóði næst eftir u.þ.b. 2 klst.
VerkunartímiUm 24 klst.
Þörf á að breyta mataræði meðan lyfið er tekiðEngin.
GeymslaGeymist í lokuðum umbúðum við stofuhita þar sem börn hvorki ná til né sjá.
Ef skammtur gleymistNotaðu lyfið um leið og þú manst eftir því. Ef stutt er til næsta skammts skaltu sleppa þeim sem gleymdist og halda áfram að nota lyfið eins og venjulega. Ef fleiri en einn skammtur gleymast í röð skaltu hafa samband við lækni. Ekki nota tvo skammta í einu.
Hvernig á að hætta töku lyfsinsAukin hætta er á blóðtappamyndun þegar notkun lyfsins er hætt. Ekki hætta notkun lyfsins nema í samráði við lækni.
Ef tekinn er of stór skammturHafðu samband við lækni í öllum tilfellum. Ef blæðingar sjást, t.d. undir húð, eða ef meðvitund skerðist skaltu leita neyðarhjálpar þegar í stað.
LangtímanotkunLyfið er notað í 5-9 daga. Virkni og öryggi meðferðar með lyfinu lengur en í 9 daga hefur ekki verið staðfest.

Aukaverkanir

Algengar aukaverkanir (>1%):
  • Óeðlilegar blæðingar
    Leitið strax til læknis
  • Svartar eða blóðugar hægðir, blóð í þvagi
    Leitið strax til læknis
Sjaldgæfar aukaverkanir (<1%):
  • Útbrot, kláði
    Leitið til læknis
  • Mæði, verkur fyrir brjósti
    Leitið strax til læknis

Milliverkanir

Lyf sem geta aukið blæðingarhættu skal ekki gefa samtímis fondaparinúx. Náttúrulyfið ginkgo getur aukið blæðingahættu.

Nánari upplýsingar

Leitið ráða hjá heilbrigðisstarfsmanni áður en lyfið er notað ef:

  • grunur leiki á um þungun eða að þú sért með barn á brjósti
  • þú sért með maga- eða skeifugarnarsár
  • þú sért með ofnæmi fyrir virka efninu eða einhverju hjálparefnanna
  • þú sért með skerta lifrar- eða nýrnastarfsemi
  • þú takir einhver önnur lyf
  • þú hafir sögu um blæðingartilhneigingu
  • þú sért undir 50 kg að þyngd
MeðgangaTakmörkuð reynsla er af notkun lyfsins hjá þunguðum konum.
BrjóstagjöfEkki er vitað hvort lyfið berst í brjóstamjólk.
BörnÖryggi og virkni lyfsins hjá sjúklingum yngri en 17 ára hefur ekki verið rannsakað.
Eldra fólkHalda skal fast við tímasetningu fyrstu innspýtingar hjá sjúklingum 75 ára eða eldri, þ.e. ekki fyrr en 6 klst. eftir að skurðaðgerð lýkur.
AksturEkki er vitað hvort lyfið skerði aksturshæfni. Ekki aka bíl fyrr en reynsla er komin á það hvaða áhrif lyfið hefur.
ÁfengiÁfengi í miklu magni getur aukið áhrif lyfsins. Æskilegt er að halda áfengisneyslu í lágmarki meðan lyfið er tekið.
ÍþróttirLeyft við æfingar og í keppni.
AnnaðUpphafsskammt skal ekki gefa fyrr en 6 klst. eftir að skurðaðgerð lýkur að því tilskildu að blæðing sé hætt.
Nánari upplýsingar um lyfið er að finna í SPC texta og í fylgiseðli lyfsins, sem finna má á heimsíðu Sérlyfjaskrá. Ef upplýsingar hér stangast á við þær upplýsingar ber að fara eftir SPC texta lyfsins og/eða fylgiseðli.