Buprenorphine Alvogen

Lyfjabokin 05 (1)
Leitaðu í Lyfjabókinni Hér finnur þú öll skráð lyf á Íslandi sem seld eru í apótekum
Lyfjabókin

Buprenorphine Alvogen

Opna mína lyfseðla
Verkjalyf

Lyfseðilsskylt

Verðflokkur G: Lyfið er niðurgreitt og fellur inn í greiðsluþrepakerfiðVirkt innihaldsefni: BúprenorfínSkráð 1. október 2020

Búprenorfín tilheyrir lyfjaflokki sem kallast ópíóíðar og hafa verkjastillandi áhrif. Lyfið er notað við langvinnum, miklum verkjum sem eru næmir fyrir ópíóíðameðferð en svara illa meðferð með verkjalyfjum án ópíóíða. Lyfið á ekki að nota við bráðaverkjum eða til verkjastillingar eftir skurðaðgerðir. Buprenorphine Alvogen er forðaplástur sem verkar með því að gefa lyfið frá sér jafnt og þétt í gegnum húðina og inn í blóðrás. Þannig fæst jöfn verkjastilling á meðan plásturinn er notaður. Meðan plásturinn er notaður er ráðlagt að forðast hita á plásturstað frá utanaðkomandi hitagjöfum, eins og frá hitapokum, heitum böðum o.s.frv., þar sem slíkt getur orðið til þess að meira af lyfinu berst úr plástrinum. Sama á við ef sjúklingur fær sótthita. Notkun lyfsins fylgir ávanahætta.

Notkun á lyfjum

LyfjaformForðaplástur á húð.
Venjulegar skammtastærðirLæknir ákvarðar skammt sem hentar hverjum einstaklingi. Skammtar eru einstaklingsbundnir og háðir því hversu miklir verkirnir eru og fyrri notkun verkjalyfja.
Hversu langur tími uns verkun kemur framHámarksáhrif koma fram eftir 3 daga.
Verkunartími7 dagar.
Þörf á að breyta mataræði meðan lyfið er tekiðEngin.
GeymslaGeymist við lægri hita en 25°C, þar sem börn hvorki ná til né sjá. Þess skal gætt að börn komist ekki í notaða plástra sem skal fargað strax og örugglega eftir notkun.
Ef skammtur gleymistNotaðu nýjan plástur um leið og þú manst eftir því og haltu síðan áfram að nota lyfið eins og venjulega. Ekki nota tvöfaldan skammt í einu.
Hvernig á að hætta töku lyfsinsEkki hætta að nota lyfið nema í samráði við lækni. Eftir að forðaplásturinn hefur verið tekinn af haldast verkjastillandi áhrif í ákveðinn tíma.
Ef tekinn er of stór skammturEf grunur leikur á ofskömmtun skal fjarlægja alla plástra og hafa samband við lækni eða eitrunarmiðstöð (sími 543 2222).
LangtímanotkunMeiri hætta er á ávana og fíkn sé lyfið notað í langan tíma.

Aukaverkanir

Algengar aukaverkanir (>1%):
  • Bjúgur
    Leitið til læknis
  • Höfuðverkur, sundl, svefndrungi
    Leitið til læknis
  • Kvíði, rugl, taugaveiklun
    Leitið til læknis
  • Kviðverkir, meltingartruflanir
    Leitið til læknis
  • Munnþurrkur, aukin svitamyndun
    Leitið til læknis
  • Náladofi
    Leitið til læknis
  • Niðurgangur, hægðatregða
    Leitið til læknis
  • Ógleði, uppköst, lystarleysi
    Leitið til læknis
  • Roði, útbrot og kláði
    Leitið til læknis
  • Þreyta, þróttleysi
    Leitið til læknis
  • Þunglyndi, svefnleysi
    Leitið til læknis
  • Verkur fyrir brjósti, mæði
    Leitið strax til læknis
Sjaldgæfar aukaverkanir (<1%):
  • Hraður hjartsláttur, hjartsláttarónot
    Leitið strax til læknis
  • Þvagtregða
    Leitið strax til læknis
  • Öndunarerfiðleikar
    Leitið strax til læknis
  • Útbrot, kláði, bjúgur
    Leitið strax til læknis

Milliverkanir

Búprenorfín getur valdið aukinni öndunarbælingu sé það notað samtímis lyfjum sem bæla miðtaugakerfið. Til þeirra lyfja teljast t.d. önnur ópíóíð lyf, sum þunglyndislyf, sefandi lyf, svefnlyf, almenn svæfinga- og deyfingalyf, róandi lyf, vöðvaslakandi lyf og áfengi. Því þarf að fylgjast mjög náið með sjúklingum sem fá þessi lyf samtímis búprenorfíni.

Nánari upplýsingar

Leitið ráða hjá heilbrigðisstarfsmanni áður en lyfið er notað ef:

  • grunur leiki á um þungun eða að þú sért með barn á brjósti
  • þú sért með ofnæmi fyrir virka efninu eða einhverju hjálparefnanna
  • þú sért með vöðvaslensfár (myasthenia gravis)
  • þú hafir haft mikinn höfuðverk eða fengið höfuðáverka
  • þú takir einhver önnur lyf
  • þú sért með krampa
  • þú sért með skerta lifrarstarfsemi
  • þú eigir við öndunarerfiðleika að stríða
  • þú eigir við áfengis- eða fíkniefnavandamál að stríða
  • þú sért með hita eða fáir hita á meðan töku lyfsins stendur
MeðgangaLyfið getur haft áhrif á fóstur og/eða nýbura.
BrjóstagjöfEkki er vitað hvort lyfið berst í brjóstamjólk. Lyfið skal ekki nota á meðan brjóstagjöf stendur.
BörnLyfið er ekki ætlað börnum yngri en 18 ára.
Eldra fólkVenjulegar skammtastærðir.
AksturLyfið hefur áhrif á hæfni til aksturs og notkunar véla. Ekki aka bíl á meðan lyfið er notað.
ÁfengiÁfengi eykur öndunarbælandi áhrif lyfsins. Ekki neyta áfengis meðan lyfið er notað.
ÍþróttirBannað í keppni.
FíknarvandamálNorspan getur verið vanabindandi. Ávanahætta er meiri eftir því sem skammtar eru stærri eða lyfið er notað í lengri tíma og hjá þeim sem hafa tilhneigingu til misnotkunar lyfja eða áfengis.
AnnaðHækkaður líkamshiti getur haft áhrif á það hvernig lyfið berst inn um húðina.
Nánari upplýsingar um lyfið er að finna í SPC texta og í fylgiseðli lyfsins, sem finna má á heimsíðu Sérlyfjaskrá. Ef upplýsingar hér stangast á við þær upplýsingar ber að fara eftir SPC texta lyfsins og/eða fylgiseðli.