Tegretol

Lyfjabokin 05 (1)
Leitaðu í Lyfjabókinni Hér finnur þú öll skráð lyf á Íslandi sem seld eru í apótekum
Lyfjabókin

Tegretol

Opna mína lyfseðla
Flogaveikilyf

Lyfseðilsskylt

Verðflokkur G: Lyfið er niðurgreitt og fellur inn í greiðsluþrepakerfiðVirkt innihaldsefni: KarbamazepínSkráð 1. desember 1972

Karbamazepín, virka efnið í Tegretol, er fyrst og fremst notað við flogaveiki. Flogaveiki er tilkomin vegna heilaskaða eða hún gengur í erfðir. Margar undirtegundir flogaveiki hafa verið flokkaðar eftir einkennum sem flogunum fylgja og breytingum sem verða á heilastarfsemi á meðan flogin ganga yfir. Flogaveikiseinkenni stafa af óeðlilega mikilli virkni taugafrumna í heila og hárri tíðni taugaboða. Breytingarnar geta verið bundnar við lítinn hluta heilans (hlutaflog) eða náð yfir stóran hluta hans (alflog). Karbamazepín minnkar hæfileika taugafrumna að senda frá sér boð með mjög stuttu millibili. Með því hindrar lyfið breytingarnar sem verða á starfsemi heilans í flogaköstunum. Lyfið virkar á margar tegundir flogaveiki, staðbundin flog og krampaflog, en það hefur ekki áhrif á störuflog. Það er einnig notað til að fyrirbyggja oflætisköst þegar ekki er hægt að nota litíum (sjá Litarex og Litíumsítrat Actavis). Karbamazepín nýtist líka við taugaverkjum í andliti, langvarandi verkjum vegna taugaskemmda, t.d. hjá sykursjúkum, og við fráhvarfseinkennum drykkjusýki. Ein aukaverkun karbamazepíns er sú að það fjölgar hormóni sem dregur úr þvagmyndun í nýrum. Hægt er að nota lyfið við flóðmigu (diabetes insipidus), sjúkdómi sem orsakast af því að of lítið myndast af þessu hormóni eða að nýrun eru ekki nógu næm fyrir áhrifum þess.

Tafla 200 mg Tafla

Notkun á lyfjum

LyfjaformTöflur og mixtúra til inntöku.
Venjulegar skammtastærðirSkammtar eru einstaklingsbundnir. Fullorðnir: 100-400 mg í senn 2-4 sinnum á dag. Börn: 10-20 mg á hvert kg líkamsþyngdar á sólarhring. Töflurnar takist með vatnsglasi. Mixtúran hristist fyrir notkun.
Hversu langur tími uns verkun kemur framMjög einstaklingsbundið.
VerkunartímiMisjafn eftir ástandi sjúklings.
Þörf á að breyta mataræði meðan lyfið er tekiðEngin, en ef lyfið er tekið með mat nýtist það betur.
GeymslaGeymist í lokuðum umbúðum við stofuhita þar sem börn hvorki ná til né sjá.
Ef skammtur gleymistTaktu lyfið um leið og þú manst eftir því. Ef stutt er til næsta skammts skaltu sleppa þeim sem gleymdist og halda áfram að taka lyfið eins og venjulega. Ef fleiri en einn skammtur gleymast í röð skaltu hafa samband við lækni. Ekki taka tvo skammta í einu.
Hvernig á að hætta töku lyfsinsSjúkdómseinkenni geta aftur komið fram þegar hætt er að taka lyfið, sérstaklega ef skammtar eru ekki minnkaðir smám saman. Ekki hætta töku lyfsins nema í samráði við lækni.
Ef tekinn er of stór skammturStakir skammtar sem eru litlu stærri en venjulega ættu ekki að skapa vanda. Ef teknir eru stórir skammtar eða ef vart verður við einhver óvenjuleg einkenni skal hafa samband við lækni strax.
LangtímanotkunKarbamazepín getur valdið blóðbreytingum og haft áhrif á lifrarstarfsemi. Fylgjast þarf reglulega með þéttni lyfsins í blóði, samsetningu blóðs og starfsemi lifrar.

Aukaverkanir

Aukaverkanir lyfsins eru fátíðar ef skammtar eru litlir, en verða meira áberandi þegar skammtar eru stækkaðir. Húðútbrot og kláði koma fram hjá 4-6% þeirra sem taka lyfið. Fái sjúklingur flog, sem tekur lyfið reglulega við flogaveiki, skal strax hafa samband við lækni.

Algengar aukaverkanir (>1%):
  • Bjúgur, þyngdaraukning
    Leitið til læknis
  • Erfiðleikar við að samhæfa hreyfingar
    Leitið til læknis
  • Hiti, slappleiki, lystarleysi og marblettir
    Leitið til læknis
  • Munnþurrkur
    Leitið til læknis
  • Niðurgangur, hægðatregða
    Leitið til læknis
  • Ógleði, uppköst, lystarleysi
    Leitið til læknis
  • Sjóntruflanir
    Leitið til læknis
  • Svimi, þreyta, höfuðverkur
    Leitið til læknis
  • Syfja, sljóleiki
    Leitið til læknis
  • Útbrot og mikill kláði
    Leitið til læknis
Sjaldgæfar aukaverkanir (<1%):
  • Gula
    Leitið til læknis
  • Skapgerðarbreytingar
    Leitið til læknis
  • Hjartsláttartruflanir, hægur hjartsláttur
    Leitið strax til læknis
  • Þvagtregða, aukin tíðni þvagláta
    Leitið strax til læknis
  • Útbrot, kláði, bjúgur og öndunarerfiðleikar
    Leitið strax til læknis

Milliverkanir

Náttúrulyfið Jóhannesarjurt og greipaldinsafi geta haft áhrif á virkni lyfsins.

Nánari upplýsingar

Leitið ráða hjá heilbrigðisstarfsmanni áður en lyfið er notað ef:

  • grunur leiki á um þungun eða að þú sért með barn á brjósti
  • þú sért með hjartasjúkdóm
  • þú sért með langvarandi lifrar- eða nýrnasjúkdóm
  • þú sért með ofnæmi fyrir virka efninu eða einhverju hjálparefnanna
  • þú takir einhver önnur lyf
  • þú sért með sögu um beinmergsbælingu
MeðgangaLyfið eykur líkur á fósturskaða sé það notað á meðgöngu. Ekki ætti að nota lyfið nema gagnsemi þess fyrir móður sé talin vega þyngra en hugsanleg áhætta fyrir fóstrið.
BrjóstagjöfLyfið berst í brjóstamjólk en í venjulegum skömmtum hefur það óveruleg áhrif á barnið.
BörnSkammtar eru háðir líkamsþyngd.
Eldra fólkAukin hætta er á aukaverkunum, minni skammtar eru oft notaðir.
AksturAuk þeirra áhrifa sem flogaveikin hefur sjálf, getur lyfið skert athygli og viðbragðsflýti og þar með aksturshæfni. Ekki aka bíl meðan lyfið er tekið.
ÁfengiEkki neyta áfengis meðan lyfið er tekið. Áfengi eykur sljóvgandi áhrif lyfsins og hraðar niðurbroti þess í lifur.
ÍþróttirLeyft við æfingar og í keppni.
AnnaðGóð tannhirða minnkar líkur á því að munnþurrkur valdi skemmdum í tannholdi.
Nánari upplýsingar um lyfið er að finna í SPC texta og í fylgiseðli lyfsins, sem finna má á heimsíðu Sérlyfjaskrá. Ef upplýsingar hér stangast á við þær upplýsingar ber að fara eftir SPC texta lyfsins og/eða fylgiseðli.