Decutan

Lyfjabokin 05 (1)
Leitaðu í Lyfjabókinni Hér finnur þú öll skráð lyf á Íslandi sem seld eru í apótekum
Lyfjabókin

Decutan

Opna mína lyfseðla
Lyf við bólum

Lyfseðilsskylt

Verðflokkur G: Lyfið er niðurgreitt og fellur inn í greiðsluþrepakerfiðVirkt innihaldsefni: ÍsótretínóínSkráð 1. febrúar 2006

Decutan er húðlyf til inntöku, efnafræðilega skylt A-vítamíni. Það er notað við þrymlabólum (acne vulgaris) í erfiðum tilfellum þegar önnur meðferð hefur ekki dugað. Ísótretínóín, virka efnið í lyfinu, hefur margvísleg áhrif á starfsemi húðfrumna; það dregur úr framleiðslu á húðfitu og fækkar bakteríum sem valda bólgu í húð, samfara þrymlabólum. Aukaverkanir ísótretínóíns takmarka þó notagildi þess. Vægari aukaverkanir lyfsins ganga oftast yfir á stuttum tíma en í stöku tilfellum geta þær haft alvarlegri afleiðingar, t.d. skert lifrarstarfsemi eða haft áhrif á sjón. Ísótretínóín getur valdið fósturskaða. Það er því aldrei gefið konum á barneignaaldri nema örugg getnaðarvörn sé notuð meðan lyfið er tekið og að hún sé notuð a.m.k. í einn mánuð eftir að töku lyfsins er hætt.

Tafla 10 mg Hylki

Notkun á lyfjum

LyfjaformHylki til inntöku.
Venjulegar skammtastærðir0,5-1 mg á hvert kg líkamsþyngdar á dag. Hylkin gleypist heil með mat.
Hversu langur tími uns verkun kemur framInnan við 4 vikur. Í upphafi meðferðar geta einkenni versnað.
VerkunartímiÁhrif vara í nokkrar vikur eftir að meðferð lýkur. Meðferð í 16 vikur getur þó dugað til að uppræta bólurnar varanlega.
Þörf á að breyta mataræði meðan lyfið er tekiðEngin.
GeymslaGeymist í lokuðum umbúðum við stofuhita þar sem börn hvorki ná til né sjá. Geymist á myrkum stað.
Ef skammtur gleymistTaktu lyfið um leið og þú manst eftir því. Ef stutt er til næsta skammts skaltu sleppa þeim sem gleymdist og halda áfram að taka lyfið eins og venjulega. Ekki taka tvo skammta í einu.
Hvernig á að hætta töku lyfsinsHætta má töku lyfsins þegar einkenni eru horfin, en bestur árangur næst þegar lokið er við meðferð eins og læknir segir til um.
Ef tekinn er of stór skammturStakir skammtar sem eru litlu stærri en venjulega ættu ekki að skapa vanda. Ef vart verður við ógleði, kviðverki, svima eða önnur óvenjuleg einkenni skal hafa samband við lækni.
LangtímanotkunLyfið er sjaldnast notað lengur en 24 vikur í senn. Æskilegt er að fylgst sé reglulega með lifrarstarfsemi og blóðfitu meðan lyfið er tekið. Konur á barneignaraldri ættu að framkvæma þungunarpróf mánaðarlega.

Aukaverkanir

Aukaverkanir lyfsins eru nokkuð tíðar. Algengustu aukaverkanir lyfsins ganga oft yfir þegar líður á meðferð eða þegar skammtar eru minnkaðir. Notkun rakakrems og varasalva er ráðlögð til að sporna við húð- og varaþurrki.

Algengar aukaverkanir (>1%):
  • Augnþurrkur, erting í augum
    Leitið til læknis
  • Bakverkir
    Leitið til læknis
  • Blóðnasir
    Leitið til læknis
  • Höfuðverkur
    Leitið til læknis
  • Verkir í vöðvum eða liðamótum
    Leitið til læknis
  • Þurrar varir, munnur eða nef
    Leitið til læknis
  • Þurr og flagnandi húð, kláði
    Leitið til læknis
  • Hiti, slappleiki, lystarleysi og marblettir
    Leitið strax til læknis
Sjaldgæfar aukaverkanir (<1%):
  • Gula
    Leitið til læknis
  • Skapgerðarbreytingar
    Leitið til læknis
  • Sýking í húð
    Leitið til læknis
  • Mikill höfuðverkur, ógleði, uppköst og sjóntruflanir
    Leitið strax til læknis
  • Svartar eða blóðugar hægðir, blóð í þvagi
    Leitið strax til læknis
  • Útbrot, kláði, bjúgur og öndunarerfiðleikar
    Leitið strax til læknis

Milliverkanir

Getur minnkað áhrif getnaðarvarna til inntöku. Forðast ætti að taka meira en ráðlagða dagskammta A-vítamíns meðan lyfið er tekið.

Nánari upplýsingar

Leitið ráða hjá heilbrigðisstarfsmanni áður en lyfið er notað ef:

  • grunur leiki á um þungun eða að þú sért með barn á brjósti
  • þú sért með langvarandi lifrar- eða nýrnasjúkdóm
  • þú sért með ofnæmi fyrir virka efninu eða einhverju hjálparefnanna
  • þú sért með sykursýki
  • þú takir einhver önnur lyf
  • þú hafir sögu um þunglyndi
MeðgangaLyfið eykur líkur á fósturskaða sé það notað á meðgöngu. Það er aldrei gefið á meðgöngu og konur á barneignaaldri ættu að nota örugga getnaðarvörn meðan lyfið er tekið og í minnst einn mánuð eftir að töku þess hættir.
BrjóstagjöfEkki er vitað hvort lyfið berst í brjóstamjólk. Hætta skal brjóstagjöf meðan lyfið er tekið.
BörnLyfið er ekki ætlað börnum yngri en 12 ára eða fyrir kynþroska.
Eldra fólkLyfið er venjulega ekki notað.
AksturNætursjón getur versnað. Ekki aka bíl fyrr en reynsla er komin á það hvaða áhrif lyfið hefur.
ÁfengiForðastu áfengi meðan lyfið er tekið.
ÍþróttirLeyft við æfingar og í keppni.
AnnaðHúðin er viðkvæmari fyrir sólarljósi meðan lyfið er tekið.
Nánari upplýsingar um lyfið er að finna í SPC texta og í fylgiseðli lyfsins, sem finna má á heimsíðu Sérlyfjaskrá. Ef upplýsingar hér stangast á við þær upplýsingar ber að fara eftir SPC texta lyfsins og/eða fylgiseðli.