Nexplanon

Lyfjabokin 05 (1)
Leitaðu í Lyfjabókinni Hér finnur þú öll skráð lyf á Íslandi sem seld eru í apótekum
Lyfjabókin

Nexplanon

Opna mína lyfseðla
Getnaðarvörn

Lyfseðilsskylt

Verðflokkur 0: Lyfið er ekki niðurgreitt og fellur ekki inn í greiðsluþrepakerfiðVirkt innihaldsefni: EtónógestrelSkráð 1. desember 2016

Nexplanon er lágskammta getnaðarvarnarlyf. Lyfið er í formi vefjalyfs og með langvarandi verkun. Það brotnar ekki niður í líkamanum og ætlast er til þess að lyfið sé sett undir húð. Lyfið er geymt í litlum, sveigjanlegum staf sem er 4 cm langur og 2 mm í þvermál. Lyfið inniheldur virka efnið etónógestrel, sem binst prógesterónviðtökum, og hefur þá sömu áhrif á líkamann og kvenhormónið prógesterón. Etónógestrel er virkt umbrotsefni lyfsins desógestrels. Getnaðarvörn lyfsins byggist fyrst og fremst á því að hindra egglos. Auk þess hefur lyfið líka áhrif á slímmyndun í leghálsinum og veldur því að sæðisfrumur komast síður upp í legið. Kona getur hvenær sem er óskað eftir því að vefjalyfið verði fjarlægt, en hámarksnotkunartími hvers vefjalyfs er 3 ár.

Notkun á lyfjum

LyfjaformVefjalyf undir húð.
Venjulegar skammtastærðirVefjalyfið er langverkandi og því er komið fyrir undir húð í upphafi meðferðar.
Hversu langur tími uns verkun kemur framLyfið veitir örugga getnaðarvörn strax frá fyrsta degi eftir ísetningu lyfsins.
VerkunartímiHámarksverkunartími er 3 ár.
Þörf á að breyta mataræði meðan lyfið er tekiðEngin.
GeymslaLyfið er staðsett undir húð allan meðferðartímann.
Ef skammtur gleymistEngin hætta er á því að skammtur gleymist vegna staðsetningar lyfsins.
Hvernig á að hætta töku lyfsinsLæknir getur fjarlægt vefjalyfið hvenær sem hentar.
Ef tekinn er of stór skammturHverfandi hætta er á ofskömmtun. Ávallt skal fjarlægja vefjalyfið áður en nýtt er sett í staðinn. Ef vart verður við óvenjuleg einkenni skal hafa samband við lækni.
LangtímanotkunÁn vandkvæða en ráðlegt er að fara reglulega í eftirlit hjá lækni. Ákveðið nánar í samráði við lækni.

Aukaverkanir

Aukaverkanir lyfsins eru oftast vægar. Við ísetningu lyfsins og þegar það er fjarlægt geta komið fram marblettir, minniháttar staðbundin húðerting, verkir eða kláði. Stundum myndast ör. Stöku sinnum hefur orðið vart þungunarfrekna, sem lýsa sér sem brúnir blettir í andliti, einkum hjá konum með sögu um slíkt á meðgöngu. Konur með tilhneigingu til þungunarfrekna ættu að forðast sólarljós eða útfjólubláa geislun á meðan þær nota lyfið.

Algengar aukaverkanir (>1%):
  • Aukin matarlyst
    Leitið til læknis
  • Bólur í húð, hárlos
    Leitið til læknis
  • Eymsli og verkir í brjóstum
    Leitið til læknis
  • Flensulík einkenni
    Leitið til læknis
  • Hitakóf
    Leitið til læknis
  • Höfuðverkur, svimi, þreyta
    Leitið til læknis
  • Kviðverkir, uppþemba
    Leitið til læknis
  • Minnkuð kynhvöt
    Leitið til læknis
  • Ógleði
    Leitið til læknis
  • Óreglulegar tíðablæðingar, tíðaverkir
    Leitið til læknis
  • Sýking í leggöngum
    Leitið til læknis
  • Verkur á stungustað
    Leitið til læknis
  • Þunglyndi, skapsveiflur
    Leitið til læknis
  • Þyngdarbreytingar
    Leitið til læknis
Sjaldgæfar aukaverkanir (<1%):
  • Bólga eða verkir í fótum eða nára, verkur fyrir brjósti
    Leitið strax til læknis
  • Gula, mjög mikill kláði
    Leitið strax til læknis
  • Mæði, mjög mikill höfuðverkur, sjóntruflanir
    Leitið strax til læknis

Milliverkanir

Jóhannesarjurt og ginseng geta haft áhrif á virkni lyfsins.

Nánari upplýsingar

Leitið ráða hjá heilbrigðisstarfsmanni áður en lyfið er notað ef:

  • grunur leiki á um þungun eða að þú sért með barn á brjósti
  • þú sért með háan blóðþrýsting, hjarta- eða æðasjúkdóm
  • þú sért með langvarandi lifrar- eða nýrnasjúkdóm
  • þú sért með ofnæmi fyrir virka efninu eða einhverju hjálparefnanna
  • þú sért með sykursýki
  • þú hafir fengið krampa eða sért með flogaveiki
  • þú takir einhver önnur lyf
  • þú sért með blæðingar frá fæðingarvegi af óþekktum ástæðum
MeðgangaLyfið á ekki að nota á meðgöngu. Takmörkuð reynsla er af notkun lyfsins hjá þunguðum konum.
BrjóstagjöfLyfið berst í brjóstamjólk og getur haft áhrif á barnið.
BörnLyfið er ekki ætlað börnum yngri en 18 ára.
Eldra fólkÖryggi og verkun lyfsins hefur einungis verið staðfest hjá konum á aldrinum 18 til 40 ára.
AksturLyfið hefur ekki áhrif á aksturshæfni.
ÁfengiÍ litlum skömmtum hefur áfengi ekki áhrif á verkun lyfsins.
ÍþróttirLeyft við æfingar og í keppni.
Nánari upplýsingar um lyfið er að finna í SPC texta og í fylgiseðli lyfsins, sem finna má á heimsíðu Sérlyfjaskrá. Ef upplýsingar hér stangast á við þær upplýsingar ber að fara eftir SPC texta lyfsins og/eða fylgiseðli.