Emla

Lyfjabokin 05 (1)
Leitaðu í Lyfjabókinni Hér finnur þú öll skráð lyf á Íslandi sem seld eru í apótekum
Lyfjabókin

Emla

Opna mína lyfseðla
Staðdeyfilyf

Lausasölulyf/Lyfseðilsskylt

Verðflokkur 0: Lyfið er ekki niðurgreitt og fellur ekki inn í greiðsluþrepakerfiðVirkt innihaldsefni: Lídókaín, PrílókaínSkráð 1. janúar 1987

Emla inniheldur lídókaín og prílókaín sem eru staðdeyfandi efni. Þegar efnin eru borin á húð hindra þau að taugaboð berist frá skynfrumum undir húðinni. Kremið er notað við sársauka í húð, t.d. eftir sólbruna, eða á aumar geirvörtur. Þegar lídókaín og prílókaín eru notuð saman útvortis nær deyfingin dýpra inn í húðina en þegar hvort lyf er notað fyrir sig, og getur því í vissum tilfellum komið í stað deyfingar með lídókaín stungulyfi. Kremið er ætlað til staðdeyfingar á húð, t.d. fyrir stungur þegar setja á upp æðalegg, þegar taka á blóðsýni eða vegna minni háttar skurðaðgerða á yfirborði líkamans. Kremið má nota á slímhúð kynfæra, t.d. fyrir minni háttar aðgerðir, með staðdeyfilyfi í stungulyfsformi eða á fótasár til að auðvelda hreinsun þeirra. Plásturinn er ætlaður til staðdeyfingar á óskaddaðri húð fyrir minni háttar aðgerðir eins og nálaísetningar, fyrir skurðaðgerðir á staðbundnum vefjaskemmdum og þegar skrapa á frauðvörtur af börnum með barnaexem. Nota þarf plástur í a.m.k. 60 mínútur til að fá fram nægilega staðdeyfingu á óskaddaðri húð. Dýpt verkjadeyfingar eykst eftir því sem plásturinn er lengur á húðinni. Ekki ætti að nota plásturinn á opin sár.

Notkun á lyfjum

LyfjaformÚtvortis krem og plástur á húð.
Venjulegar skammtastærðirPlástur er settur á 1-3 klst. fyrir aðgerð. Krem er borið á í þykku lagi eftir þörfum. Krem, borið á 1-2 klst. fyrir aðgerð, veitir nægjanlega staðdeyfingu.
Hversu langur tími uns verkun kemur framMismunandi eftir notkun. Staðdeyfandi verkun lídókaíns kemur fram á nokkrum mín.
VerkunartímiMisjafnt eftir notkun. Lídókaín sjálft er skammvirkt.
Þörf á að breyta mataræði meðan lyfið er tekiðEngin.
GeymslaGeymist í lokuðum umbúðum við stofuhita þar sem börn hvorki ná til né sjá. Má ekki frjósa.
Ef skammtur gleymistLyfið er ekki notað að staðaldri.
Hvernig á að hætta töku lyfsinsLyfið er ekki notað að staðaldri.
Ef tekinn er of stór skammturStakir skammtar sem eru litlu stærri en venjulega ættu ekki að skapa vanda. Ef notaðir eru mjög stórir skammtar eða ef vart verður við einhver óvenjuleg einkenni skal hafa samband við lækni.
LangtímanotkunLyfið er almennt ekki notað nema í skamman tíma í senn.

Aukaverkanir

Algengar aukaverkanir (>1%):
  • Sviði, kláði eða roði í húð
    Leitið til læknis
Sjaldgæfar aukaverkanir (<1%):
  • Útbrot, kláði, bjúgur og öndunarerfiðleikar
    Leitið strax til læknis

Nánari upplýsingar

Leitið ráða hjá heilbrigðisstarfsmanni áður en lyfið er notað ef:

  • grunur leiki á um þungun
  • þú sért með ofnæmi fyrir virka efninu eða einhverju hjálparefnanna
  • þú takir einhver önnur lyf
MeðgangaEngin þekkt áhætta er af notkun lyfsins á meðgöngu. Ekki nota nein lyf á fyrstu 3 mánuðum meðgöngu nema í samráði við lækni.
BrjóstagjöfLyfið berst í brjóstamjólk en í venjulegum skömmtum er ólíklegt að það hafi áhrif á barnið.
BörnÞegar kremið er notað á börn yngri en 12 ára mega skammtar ekki vera stærri en 0,1 g á hvert kg líkamsþyngdar.
Eldra fólkVenjulegar skammtastærðir.
AksturLyfið hefur ekki áhrif á aksturshæfni.
ÁfengiÍ litlum skömmtum hefur áfengi ekki áhrif á verkun lyfsins.
ÍþróttirLeyft við æfingar og í keppni.
AnnaðEngin rotvarnarefni eru í kreminu.
Nánari upplýsingar um lyfið er að finna í SPC texta og í fylgiseðli lyfsins, sem finna má á heimsíðu Sérlyfjaskrá. Ef upplýsingar hér stangast á við þær upplýsingar ber að fara eftir SPC texta lyfsins og/eða fylgiseðli.