Fentanyl Alvogen

Lyfjabokin 05 (1)
Leitaðu í Lyfjabókinni Hér finnur þú öll skráð lyf á Íslandi sem seld eru í apótekum
Lyfjabókin

Fentanyl Alvogen

Opna mína lyfseðla
Verkjalyf

Lyfseðilsskylt

Verðflokkur G: Lyfið er niðurgreitt og fellur inn í greiðsluþrepakerfiðVirkt innihaldsefni: FentanýlSkráð 1. september 2020

Fentanyl Alvogen er verkjastillandi lyf. Lyfið er skylt morfíni og hefur sterka verkjastillandi verkun auk slævandi áhrifa. Það er notað við langvinnum verkjum sem eru næmir fyrir morfínlyfjum, svo sem sársauka vegna krabbameins. Lyfið á hins vegar ekki að nota gegn skyndilegum verkjum eða verkjum eftir skurðaðgerðir. Þol getur myndast gegn lyfinu og sífellt stærri skammtar geta orðið nauðsynlegir. Það er þó mjög einstaklingsbundið hversu hratt þolið myndast. Notkun lyfsins fylgir einnig ávanahætta. Í Fentanyl Alvogen er virka efnið fentanýl bundið í svokölluðum forðaplástri sem gefur lyfið frá sér jafnt og þétt í gegnum húðina og inn á blóðrásina. Á þann hátt fæst jöfn verkjastilling í þann tíma sem lyfið er notað. Athugið að ef sjúklingur fær sótthita getur meira af lyfinu borist úr plástrinum inn í blóðrásina og þá þarf að fylgjast vel með viðkomandi og jafnvel að minnka lyfjaskammtinn. Plásturssvæðið má helst ekki hitna.

Notkun á lyfjum

LyfjaformForðaplástur á húð.
Venjulegar skammtastærðirSkammtar eru einstaklingsbundnir og háðir aldri, heilsufari, því hversu miklir verkirnir eru og fyrri notkun verkjalyfja.
Hversu langur tími uns verkun kemur fram12-24 klst. í upphafi meðferðar.
VerkunartímiUm 72 klst., en þá skal skipta um plástur. Við áframhaldandi notkun helst verkun stöðug þegar skipt er um plástur á 72 klst. fresti.
Þörf á að breyta mataræði meðan lyfið er tekiðEngin.
GeymslaGeymist í lokuðum umbúðum við stofuhita þar sem börn hvorki ná til né sjá. Gætið þess líka að börn komist ekki í notaða plástra og fargið þeim strax og örugglega eftir notkun.
Ef skammtur gleymistNotaðu nýjan plástur um leið og þú manst eftir því og haltu síðan áfram að nota lyfið eins og venjulega. Ekki nota tvöfaldan skammt í einu.
Hvernig á að hætta töku lyfsinsEkki hætta að nota lyfið nema í samráði við lækni. Notkun lyfsins skal hætt smátt og smátt í fullu samráði við lækni.
Ef tekinn er of stór skammturHafðu samband við lækni sem fyrst. Ef öndun er hæg eða óregluleg, eða ef meðvitund skerðist þarf að koma sjúklingi strax til læknis.
LangtímanotkunÞol myndast við áhrifum fentanýls og því getur þurft að stækka skammtana. Hversu hratt þol myndast er einstaklingsbundið. Meiri hætta er á ávana og fíkn sé lyfið notað í langan tíma.

Aukaverkanir

Algengustu aukaverkanir lyfsins eru ógleði og uppköst (28%) og syfja (23%). Alvarlegasta aukaverkunin er hömlun öndunar en hún er háð skömmtum.

Algengar aukaverkanir (>1%):
  • Flensulík einkenni, kviðverkir
    Leitið til læknis
  • Höfuðverkur, syfja, munnþurrkur
    Leitið til læknis
  • Lystarleysi
    Leitið til læknis
  • Ógleði, uppköst, hægðatregða, meltingartruflanir
    Leitið til læknis
  • Skapgerðarbreytingar, kvíði
    Leitið til læknis
  • Svimi, róandi áhrif
    Leitið til læknis
  • Svitamyndun
    Leitið til læknis
  • Útbrot, kláði
    Leitið til læknis
Sjaldgæfar aukaverkanir (<1%):
  • Hjartsláttartruflanir
    Leitið til læknis
  • Útbrot, kláði, bjúgur og öndunarerfiðleikar
    Leitið strax til læknis
  • Þvagtregða
    Leitið strax til læknis

Milliverkanir

Fentanýl getur valdið auknum bælandi áhrifum með grunnri öndun, lágþrýstingi, miklum sefandi áhrifum og dái samtímis notkun lyfja sem hafa áhrif á miðtaugakerfið. Til þeirra lyfja teljast til dæmis þunglyndislyf, sefandi lyf, svefnlyf, almenn svæfinga- og deyfingalyf, róandi lyf, vöðvaslakandi lyf og áfengi. Því þarf að fylgjast mjög náið með sjúklingum sem fá þessi lyf samtímis fentanýli.

Nánari upplýsingar

Leitið ráða hjá heilbrigðisstarfsmanni áður en lyfið er notað ef:

  • grunur leiki á um þungun eða að þú sért með barn á brjósti
  • þú sért með hjartasjúkdóm
  • þú sért með langvarandi lifrar- eða nýrnasjúkdóm
  • þú sért með lungnasjúkdóm, svo sem astma eða berkjubólgu
  • þú sért með ofnæmi fyrir virka efninu eða einhverju hjálparefnanna
  • þú sért með vöðvaslensfár (myasthenia gravis)
  • þú hafir haft mikinn höfuðverk eða fengið höfuðáverka
  • þú takir einhver önnur lyf
MeðgangaLyfið getur haft áhrif á fóstur og/eða nýbura.
BrjóstagjöfLyfið berst í brjóstamjólk og getur haft áhrif á barnið.
BörnLyfið er ekki ætlað börnum yngri en 12 ára.
Eldra fólkAuknar líkur eru á aukaverkunum, oftast eru minni skammtar notaðir.
AksturLyfið hefur áhrif á viðbragðsflýti og aksturshæfni. Ekki aka bíl á meðan lyfið er notað.
ÁfengiÁfengi eykur öndunarhemjandi áhrif fentanýls. Ekki neyta áfengis meðan lyfið er notað.
ÍþróttirBannað í keppni.
FíknarvandamálFentanyl Actavis getur verið vanabindandi. Ávanahætta er meiri eftir því sem skammtar eru stærri eða lyfið er notað í lengri tíma og hjá þeim sem hafa tilhneigingu til misnotkunar lyfja eða áfengis.
Nánari upplýsingar um lyfið er að finna í SPC texta og í fylgiseðli lyfsins, sem finna má á heimsíðu Sérlyfjaskrá. Ef upplýsingar hér stangast á við þær upplýsingar ber að fara eftir SPC texta lyfsins og/eða fylgiseðli.