Nozinan

Lyfjabokin 05 (1)
Leitaðu í Lyfjabókinni Hér finnur þú öll skráð lyf á Íslandi sem seld eru í apótekum
Lyfjabókin

Nozinan

Opna mína lyfseðla
Sefandi lyf

Lyfseðilsskylt

Verðflokkur G/0: Lyfið er niðurgreitt og fellur inn í greiðsluþrepakerfiðVirkt innihaldsefni: Levómeprómazín

Nozinan inniheldur virka efnið levómeprómazín. Lyfið er sefandi og með breitt verkunarsvið. Það er skylt klórprómazíni og hefur að flestu leyti svipaða verkun, en róandi áhrif levómeprómazíns eru þó töluvert meiri. Levómeprómazín hefur hamlandi áhrif á mörg boðefnakerfi í heila og dregur úr sturlunareinkennum. Levómeprómazín er notað við geðklofa, sturlunareinkennum, fráhvarfseinkennum eftir fíkniefnaneyslu, spennu, óróa og árásarhneigð sem ekki er hægt að meðhöndla með öðrum hætti. Það er sérstaklega hentugt þegar þörf er á miklum róandi áhrifum, t.d. þegar svefntruflanir fylgja ofangreindum einkennum. Levómeprómazín má einnig nota við ógleði, langvarandi hiksta, til þess að auka áhrif verkjalyfja og líka gegn taugaverkjum. Aukaverkanir af völdum lyfsins eru nokkuð algengar. Munnþurrkur og hreyfitruflanir, sem líkjast einkennum parkinsonsveiki, eru þær algengustu. Alvarlegustu aukaverkanir af völdum levómeprómazíns eru síðkomnar hreyfitruflanir (tardive dyskinesia) eftir langtímanotkun lyfsins. Þessar aukaverkanir geta orðið óafturkræfar en í flestum tilfellum ganga þær þó til baka á nokkrum mánuðum eftir að lyfjagjöf hættir. Ungir sjúklingar fá síður þessar aukaverkanir og þær ganga fremur til baka hjá þeim eftir að lyfjagjöf lýkur.

Tafla 5 mg Tafla

Notkun á lyfjum

LyfjaformTöflur til inntöku.
Venjulegar skammtastærðirSkammtar eru háðir ástandi sjúklings. Fullorðnir: 2,5-200 mg í senn 1-3svar á dag. Börn eldri en 5 ára: Þriðjungur til helmingur af fullorðinsskammti. Börn yngri en 5 ára: 0,5 mg á hvert kg líkamsþyngdar á dag. Töflurnar gleypist heilar.
Hversu langur tími uns verkun kemur framEkki að fullu þekkt.
VerkunartímiEkki að fullu þekktur.
Þörf á að breyta mataræði meðan lyfið er tekiðEngin.
GeymslaGeymist í lokuðum umbúðum við stofuhita þar sem börn hvorki ná til né sjá.
Ef skammtur gleymistTaktu lyfið um leið og þú manst eftir því. Ef stutt er til næsta skammts skaltu sleppa þeim sem gleymdist og halda áfram að taka lyfið eins og venjulega. Ekki taka tvo skammta í einu.
Hvernig á að hætta töku lyfsinsSjúkdómseinkenni geta aftur komið fram ef töku lyfsins er hætt. Ekki hætta að taka lyfið nema í samráði við lækni.
Ef tekinn er of stór skammturStakir skammtar sem eru litlu stærri en venjulega ættu ekki að valda óþægindum. Ef teknir eru stórir skammtar eða vart verður við einkenni eins og vöðvaslappleika, yfirlið, meðvitundarleysi, krampa eða stífleika í vöðvum skal hafa samband við lækni strax.
LangtímanotkunParkinsonslíkar hreyfitruflanir koma helst fram ef lyfið er notað lengur en í nokkra mánuði í senn. Notkun levómeprómazíns í langan tíma getur leitt til síðkominna hreyfitruflana (tardive dyskinesia). Þær koma fram sem ósjálfráðar hreyfingar, oftast í andlitsvöðvum. Lyfið getur valdið þyngdaraukningu þegar það er tekið í langan tíma.

Aukaverkanir

Flestar aukaverkanir lyfsins eru skammtaháðar, þ.e. líklegri eða meiri eftir því sem skammtar eru hærri, en tíðni aukaverkana fer einnig eftir meðferðartíma og við hverju lyfið er notað. Þær algengustu eru þreyta, svimi og munnþurrkur, en parkinsonslík einkenni eru þær aukaverkanir sem takmarka helst notkun lyfsins.

Algengar aukaverkanir (>1%):
  • Hraður hjartsláttur, lágur blóðþrýstingur
    Leitið til læknis
  • Hreyfitruflanir, parkinsonseinkenni
    Leitið til læknis
  • Útbrot, kláði
    Leitið til læknis
  • Þreyta, svimi, munnþurrkur
    Leitið til læknis
  • Þyngdaraukning
    Leitið til læknis
Sjaldgæfar aukaverkanir (<1%):
  • Brjóstastækkun karlmanna
    Leitið til læknis
  • Gula
    Leitið til læknis
  • Hiti, slappleiki, lystarleysi og marblettir
    Leitið strax til læknis
  • Krampar
    Leitið strax til læknis

Nánari upplýsingar

Leitið ráða hjá heilbrigðisstarfsmanni áður en lyfið er notað ef:

  • grunur leiki á um þungun eða að þú sért með barn á brjósti
  • þú sért með flogaveiki
  • þú sért með gláku eða hækkaðan augnþrýsting
  • þú sért með hjarta- eða æðasjúkdóm
  • þú sért með langvarandi lifrar- eða nýrnasjúkdóm
  • þú sért með ofnæmi fyrir virka efninu eða einhverju hjálparefnanna
  • þú sért með sykursýki
  • þú sért með vöðvaslensfár (myasthenia gravis)
  • þú sért með öndunarfærasjúkdóm
  • þú takir einhver önnur lyf
MeðgangaNokkur hætta er á því að lyfið hafi áhrif á fóstur.
BrjóstagjöfLyfið berst í brjóstamjólk og getur haft áhrif á barnið.
BörnMinni skammtar eru notaðir.
Eldra fólkOftast eru minni skammtar notaðir.
AksturLyfið getur virkað sljóvgandi og skert viðbragðsflýti, og þar með haft áhrif á hæfni til að stjórna ökutækjum. Ekki aka bíl fyrr en reynsla er komin á það hvaða áhrif lyfið hefur.
ÁfengiGetur aukið sljóvgandi áhrif lyfsins. Ekki neyta áfengis meðan lyfið er tekið.
ÍþróttirLeyft við æfingar og í keppni.
Nánari upplýsingar um lyfið er að finna í SPC texta og í fylgiseðli lyfsins, sem finna má á heimsíðu Sérlyfjaskrá. Ef upplýsingar hér stangast á við þær upplýsingar ber að fara eftir SPC texta lyfsins og/eða fylgiseðli.