Noritren

Lyfjabokin 05 (1)
Leitaðu í Lyfjabókinni Hér finnur þú öll skráð lyf á Íslandi sem seld eru í apótekum
Lyfjabókin

Noritren

Opna mína lyfseðla
Geðdeyfðarlyf

Lyfseðilsskylt

Verðflokkur G: Lyfið er niðurgreitt og fellur inn í greiðsluþrepakerfiðVirkt innihaldsefni: NortriptýlínSkráð 1. janúar 1985

Noritren inniheldur virka efnið nortriptýlín. Lyfið er geðdeyfðarlyf og tilheyrir flokki þríhringlaga geðdeyfðarlyfja, sem eru svo nefnd vegna efnafræðilegrar byggingar sinnar. Lyf í þessum flokki voru þau fyrstu sem notuð voru við geðdeyfð en verkunarmáti og aukaverkanir þeirra flestra er svipaður. Þau hafa áhrif á flest einkenni geðdeyfðar, bæta skap og matarlyst, auka líkamlega virkni og áhuga á daglegu lífi. Þessi áhrif koma aðeins fram hjá sjúklingum með geðdeyfð en sjást ekki ef heilbrigðir taka lyfin. Helstu gallar þríhringlaga geðdeyfðarlyfjanna eru þeir að aukaverkanir eru nokkuð tíðar og að töluverð hætta er á eiturverkunum ef mjög stórir skammtar eru teknir. Nortriptýlín hefur um margt svipuð áhrif og geðdeyfðarlyfið amitriptýlín. Nortriptýlín hefur þó lítil róandi áhrif og veldur síður aukaverkunum á borð við munnþurrk, hægðatregðu og sjónstillingartruflunum en mörg önnur þríhringlaga geðdeyfðarlyf. Lyfið er fyrst og fremst notað við geðdeyfð, og er skráð hér á landi eingöngu til notkunar gegn geðdeyfð. Það getur þó í sumum tilfellum komið að gagni við næturþvaglátum barna, eða þegar aðrar aðferðir hafa ekki gefið viðunandi árangur.

Tafla 10 mg Tafla

Notkun á lyfjum

LyfjaformTöflur til inntöku.
Venjulegar skammtastærðir25-75 mg í senn 2svar á dag. Töflurnar gleypist með vatnsglasi.
Hversu langur tími uns verkun kemur framUm 2-3 vikur.
VerkunartímiMisjafn á milli einstaklinga.
Þörf á að breyta mataræði meðan lyfið er tekiðEngin.
GeymslaGeymist í lokuðum umbúðum við stofuhita þar sem börn hvorki ná til né sjá.
Ef skammtur gleymistTaktu lyfið um leið og þú manst eftir því. Ef stutt er til næsta skammts skaltu sleppa þeim sem gleymdist og halda áfram að taka lyfið eins og venjulega. Ef fleiri en einn skammtur gleymast í röð skaltu hafa samband við lækni. Ekki taka tvo skammta í einu.
Hvernig á að hætta töku lyfsinsSjúkdómseinkenni geta aftur komið fram þegar töku lyfsins lýkur. Ekki hætta að taka lyfið nema í samráði við lækni. Þegar meðferð er hætt skal minnka skammtinn smám saman í samráði við lækni.
Ef tekinn er of stór skammturLeitaðu læknis í öllum tilvikum. Ef vart verður við einkenni eins og hjartsláttarónot, krampa eða skerta meðvitund skal leita neyðarhjálpar þegar í stað.
LangtímanotkunÁn vandkvæða. Ef munnþurrkur af völdum lyfsins er viðvarandi getur það skaðað tannhold og slímhúð í munni.

Aukaverkanir

Aukaverkanir lyfsins eru háðar skammtastærð og hverfa venjulega eftir nokkurra vikna meðferð eða ef skammtar eru minnkaðir.

Algengar aukaverkanir (>1%):
  • Breytingar á kynhvöt
    Leitið til læknis
  • Breytt bragðskyn
    Leitið til læknis
  • Höfuðverkur, svimi, ógleði
    Leitið til læknis
  • Hraður hjartsláttur
    Leitið til læknis
  • Munnþurrkur, hægðatregða, aukin svitamyndun
    Leitið til læknis
  • Rugl
    Leitið til læknis
  • Sjónstillingartruflanir
    Leitið til læknis
  • Skjálfti
    Leitið til læknis
  • Útbrot
    Leitið til læknis
  • Þreyta
    Leitið til læknis
  • Þyngdaraukning
    Leitið til læknis
Sjaldgæfar aukaverkanir (<1%):
  • Gula
    Leitið til læknis
  • Krampar
    Leitið strax til læknis
  • Skapgerðarbreytingar, ofskynjanir
    Leitið strax til læknis
  • Þvagtregða
    Leitið strax til læknis

Milliverkanir

Nortriptýlín má ekki nota með MAO-hemjandi lyfjum. Líða skulu a.m.k. 2 vikur á milli þess sem þessi tvö lyf eru gefin. Áhrif adrenergra lyfja (adrenalíns, noradrenalíns) og alkóhóls aukast ef þau eru gefin með nortriptýlíni. Barbitúrsýrusambönd geta dregið úr geðdeyfðarverkun lyfsins. Náttúrulyfið Jóhannesarjurt getur haft áhrif á virkni lyfsins.

Nánari upplýsingar

Leitið ráða hjá heilbrigðisstarfsmanni áður en lyfið er notað ef:

  • grunur leiki á um þungun eða að þú sért með barn á brjósti
  • þú sért með gláku eða hækkaðan augnþrýsting
  • þú sért með hjartasjúkdóm
  • þú sért með langvarandi lifrar- eða nýrnasjúkdóm
  • þú sért með of- eða vanvirkan skjaldkirtil
  • þú sért með ofnæmi fyrir virka efninu eða einhverju hjálparefnanna
  • þú sért með stækkaðan blöðruhálskirtil eða eigir erfitt með þvaglát
  • þú hafir fengið krampa eða sért með flogaveiki
  • þú takir einhver önnur lyf
MeðgangaNokkur hætta er á því að lyfið hafi áhrif á fóstur.
BrjóstagjöfLyfið berst í brjóstamjólk en í venjulegum skömmtum er ólíklegt að það hafi áhrif á barnið.
BörnLyfið er ekki ætlað börnum.
Eldra fólkMinni skammtar eru notaðir.
AksturLyfið getur haft áhrif á aksturshæfni og því skal ekki aka bíl fyrr en reynsla er komin á það hvaða áhrif lyfið hefur.
ÁfengiGetur aukið sljóvgandi áhrif lyfsins. Almennt er mælt gegn því að neyta áfengis samhliða meðferð með geðdeyfðarlyfjum.
ÍþróttirLeyft við æfingar og í keppni.
Nánari upplýsingar um lyfið er að finna í SPC texta og í fylgiseðli lyfsins, sem finna má á heimsíðu Sérlyfjaskrá. Ef upplýsingar hér stangast á við þær upplýsingar ber að fara eftir SPC texta lyfsins og/eða fylgiseðli.