Adalat Oros

Lyfjabokin 05 (1)
Leitaðu í Lyfjabókinni Hér finnur þú öll skráð lyf á Íslandi sem seld eru í apótekum
Lyfjabókin

Adalat Oros

Opna mína lyfseðla
Kalsíumgangalokar

Lyfseðilsskylt

Verðflokkur G: Lyfið er niðurgreitt og fellur inn í greiðsluþrepakerfiðVirkt innihaldsefni: NífedipínSkráð 1. júlí 1994

Adalat Oros tilheyrir flokki lyfja sem kallast kalsíumblokkarar. Lyf í honum hindra flæði kalsíums inn í vöðvafrumur, en kalsíum er nauðsynlegt fyrir samdrátt vöðvafrumna. Vöðvafrumur í líkamanum innihalda mismikið af kalsíum og eru því ekki allar jafn háðar kalsíumflæði inn í frumuna. Áhrifa kalsíumblokkara gætir því mest hjá frumum með lítið kalsíum, þ.e. vöðvafrumum í æðaveggjum og hjartavöðva. Kalsíumblokkarar eru flokkaðir innbyrðis eftir því hvort áhrif þeirra beinist aðallega að æðum eða hjarta. Virka efnið nífedipín hefur fyrst og fremst æðavíkkandi áhrif. Lyfið víkkar bæði kransæðar og slagæðar, blóðþrýstingur lækkar og blóðflæði til hjartavöðva eykst. Adalat Oros er notað við háþrýstingi og hjartaöng.

Tafla 20 mg Tafla

Notkun á lyfjum

LyfjaformForðatöflur til inntöku.
Venjulegar skammtastærðir20-120 mg í senn einu sinni á dag. Forðatöflurnar gleypist heilar með vatnsglasi. Má hvorki tyggja þær né mylja.
Hversu langur tími uns verkun kemur framVið háþrýstingi: 20 mín eftir inntöku (lengur með forðatöflum).
Verkunartími12-24 klst. eftir stakan skammt; 24 klst. eftir stöðuga notkun.
Þörf á að breyta mataræði meðan lyfið er tekiðGreipaldinsafi getur minnkað útskilnað nífedipíns úr líkamanum.
GeymslaGeymist í lokuðum umbúðum við stofuhita þar sem börn hvorki ná til né sjá.
Ef skammtur gleymistTaktu lyfið um leið og þú manst eftir því. Ef stutt er til næsta skammts skaltu sleppa þeim sem gleymdist og halda áfram að taka lyfið eins og venjulega. Ekki taka tvo skammta í einu.
Hvernig á að hætta töku lyfsinsEinkenni sjúkdóms geta versnað þegar töku lyfsins er hætt. Ekki hætta töku lyfsins nema í samráði við lækni.
Ef tekinn er of stór skammturStakir skammtar sem eru litlu stærri en venjulega ættu ekki að skapa vanda. Ef teknir eru stórir skammtar eða ef vart verður við óvenjuleg einkenni skal hafa samband við lækni.
LangtímanotkunÁn vandkvæða.

Aukaverkanir

Flestar aukaverkanir lyfsins eru skammtaháðar, þ.e. meira áberandi við stærri skammta, og byggjast á æðavíkkandi áhrifum þess. Þessar aukaverkanir eru tíðari í upphafi meðferðar en mildast með tímanum.

Algengar aukaverkanir (>1%):
  • Bjúgur í ökklum
    Leitið til læknis
  • Hægðatregða
    Leitið til læknis
  • Höfuðverkur, svimi, þróttleysi
    Leitið til læknis
  • Ógleði, meltingaróþægindi
    Leitið til læknis
  • Roði í andliti
    Leitið til læknis
  • Hjartsláttarónot
    Leitið strax til læknis
Sjaldgæfar aukaverkanir (<1%):
  • Þvagtregða
    Leitið til læknis
  • Hiti, slappleiki, lystarleysi og marblettir
    Leitið strax til læknis
  • Hjartsláttartruflanir, hraður hjartsláttur
    Leitið strax til læknis
  • Verkur fyrir brjósti, mæði
    Leitið strax til læknis
  • Útbrot, kláði, bjúgur og öndunarerfiðleikar
    Leitið strax til læknis

Milliverkanir

Náttúrulyfið Jóhannesarjurt getur dregið úr virkni lyfsins. Ginkgo getur aukið líkur á aukaverkunum lyfsins.

Nánari upplýsingar

Leitið ráða hjá heilbrigðisstarfsmanni áður en lyfið er notað ef:

  • grunur leiki á um þungun eða að þú sért með barn á brjósti
  • þú sért með einhverja meltingarkvilla
  • þú sért með langvarandi lifrar- eða nýrnasjúkdóm
  • þú sért með ofnæmi fyrir virka efninu eða einhverju hjálparefnanna
  • þú takir einhver önnur lyf
MeðgangaNokkur hætta er á því að lyfið hafi áhrif á fóstur.
BrjóstagjöfLyfið berst í brjóstamjólk og getur haft áhrif á barnið.
BörnLyfið er ekki ætlað börnum.
Eldra fólkMinni skammtar eru oft notaðir.
AksturLyfið getur valdið svima og þar með haft áhrif á aksturshæfni. Ekki aka bíl fyrr en reynsla er komin á það hvaða áhrif lyfið hefur.
ÁfengiÁfengi getur haft óæskileg áhrif á blóðþrýsting og hjartsláttarhraða. Æskilegt er að halda áfengisneyslu í lágmarki meðan lyfið er tekið.
ÍþróttirLeyft við æfingar og í keppni.
Nánari upplýsingar um lyfið er að finna í SPC texta og í fylgiseðli lyfsins, sem finna má á heimsíðu Sérlyfjaskrá. Ef upplýsingar hér stangast á við þær upplýsingar ber að fara eftir SPC texta lyfsins og/eða fylgiseðli.