Haldol Depot

Lyfjabokin 05 (1)
Leitaðu í Lyfjabókinni Hér finnur þú öll skráð lyf á Íslandi sem seld eru í apótekum
Lyfjabókin

Haldol Depot

Opna mína lyfseðla
Sefandi lyf

Lyfseðilsskylt

Verðflokkur G: Lyfið er niðurgreitt og fellur inn í greiðsluþrepakerfiðVirkt innihaldsefni: Halóperídól

Haldol Depot inniheldur virka efnið halóperídól. Lyfið er sefandi og það dregur mikið úr sturlunareinkennum sem fylgja geðklofa, oflæti og elliglöpum. Það hefur einnig áhrif á drykkjuóráð (delerium tremens), alvarlegustu fráhvarfseinkenni drykkjusýki. Talið er að þessi einkenni komi fram vegna of mikillar virkni ákveðinna taugaboðefna í heila þaðan sem skapferli, hegðun og skynjun er stjórnað. Halóperídól minnkar virkni eins þessara boðefna, eða dópamíns. Halóperídól verkar einnig kvíðastillandi og hemur uppsölu en hefur mjög veika, róandi og svæfandi verkun.

Notkun á lyfjum

LyfjaformStungulyf með forðaverkun í vöðva.
Venjulegar skammtastærðir50-300 mg í senn á 4ra vikna fresti.
Hversu langur tími uns verkun kemur framEkki að fullu þekkt.
VerkunartímiAllt að 4 vikur.
Þörf á að breyta mataræði meðan lyfið er tekiðEngin.
GeymslaGeymist í lokuðum umbúðum við stofuhita þar sem börn hvorki ná til né sjá.
Ef skammtur gleymistTaktu lyfið um leið og þú manst eftir því. Ef stutt er til næsta skammts skaltu sleppa þeim sem gleymdist og halda áfram að taka lyfið eins og venjulega. Ekki taka tvo skammta í einu.
Hvernig á að hætta töku lyfsinsSjúkdómseinkenni geta aftur komið fram ef töku lyfsins er hætt. Ekki hætta töku lyfsins nema í samráði við lækni.
Ef tekinn er of stór skammturStakir skammtar sem eru litlu stærri en venjulega ættu ekki að valda óþægindum. Ef teknir eru stórir skammtar eða vart verður við einkenni eins og sljóleika, slappleika eða stífleika í vöðvum skal hafa samband við lækni.
LangtímanotkunNotkun til lengri tíma en í nokkra mánuði getur leitt til síðkominna hreyfitruflana (tardive dyskinesia). Þær koma fram sem ósjálfráðar hreyfingar, oftast í andlitsvöðvum. Líkurnar aukast eftir því sem lyfið er notað lengur. Þessar aukaverkanir geta orðið óafturkræfar, en í flestum tilfellum ganga þær til baka á nokkrum mánuðum eftir að lyfjagjöf er hætt. Yngri sjúklingar fá síður þessar aukaverkanir og þær ganga frekar til baka hjá þeim eftir að lyfjagjöf lýkur.

Aukaverkanir

Algengustu aukaverkanir lyfsins eru hreyfitruflanir og koma fram hjá um 40-76% þeirra sem taka lyfið. Alvarlegustu aukaverkanir þess eru síðkomnar hreyfitruflanir af notkun lyfsins til lengri tíma. Þær koma fram sem ósjálfráðar hreyfingar, oftast í andlitsvöðvum, og eru í sumum tilfellum óafturkræfar.

Algengar aukaverkanir (>1%):
  • Höfuðverkur, svimi, svefnhöfgi
    Leitið til læknis
  • Hreyfitruflanir, parkinsonseinkenni
    Leitið til læknis
  • Þunglyndi
    Leitið til læknis
Sjaldgæfar aukaverkanir (<1%):
  • Brjóstastækkun karlmanna
    Leitið til læknis
  • Gula
    Leitið til læknis
  • Hiti, slappleiki, lystarleysi og marblettir
    Leitið strax til læknis
  • Hraður hjartsláttur, hjartsláttartruflanir
    Leitið strax til læknis
  • Krampar
    Leitið strax til læknis
  • Þvagtregða
    Leitið strax til læknis
  • Útbrot, kláði, bjúgur og öndunarerfiðleikar
    Leitið strax til læknis

Milliverkanir

Halóperídól eykur miðtaugakerfisbælandi áhrif annarra lyfja þ.á.m. alkóhóls, svefnlyfja, róandi lyfja og sterkra verkjalyfja.

Nánari upplýsingar

Leitið ráða hjá heilbrigðisstarfsmanni áður en lyfið er notað ef:

  • grunur leiki á um þungun eða að þú sért með barn á brjósti
  • þú sért með gláku eða hækkaðan augnþrýsting
  • þú sért með hjartasjúkdóm
  • þú sért með langvarandi lifrar- eða nýrnasjúkdóm
  • þú sért með ofnæmi fyrir virka efninu eða einhverju hjálparefnanna
  • þú sért með ofvirkan skjaldkirtil
  • þú sért með parkinsonsveiki
  • þú sért með vöðvaslensfár (myasthenia gravis)
  • þú hafir fengið krampa eða sért með flogaveiki
  • þú hafir greinst með krabbamein í brjósti
  • þú takir einhver önnur lyf
MeðgangaNokkur hætta er á því að lyfið hafi áhrif á fóstur.
BrjóstagjöfLyfið berst í brjóstamjólk og getur haft áhrif á barnið.
BörnLyfið er ekki ætlað börnum.
Eldra fólkAuknar líkur eru á aukaverkunum, minni skammtar eru oft notaðir.
AksturLyfið getur skert athygli og viðbragðsflýti og þar með aksturshæfni. Ekki aka bíl fyrr en reynsla er komin á það hvaða áhrif lyfið hefur.
ÁfengiGetur aukið sljóvgandi áhrif lyfsins. Ekki neyta áfengis meðan lyfið er tekið.
ÍþróttirLeyft við æfingar og í keppni.
Nánari upplýsingar um lyfið er að finna í SPC texta og í fylgiseðli lyfsins, sem finna má á heimsíðu Sérlyfjaskrá. Ef upplýsingar hér stangast á við þær upplýsingar ber að fara eftir SPC texta lyfsins og/eða fylgiseðli.